Даралт ихсэлт гэж юу вэ?

Зүрх нь насос мэт хүчилтөрөгч, шим тэжээлээр баялаг цусыг бүх бие рүү түлхэн гаргадаг бөгөөд энэ үед цус хөдлөхдөө судасны ханад үзүүлэх даралтыг цусны даралт гэнэ. Зүрх агших үед судасны ханад үзүүлэх хамгийн өндөр даралт болох систолын даралт, зүрх сулран (тэлж) цусыг хүлээн авах үед судасны ханад үзүүлэх диастолын даралт гэж байдаг бөгөөд 140/90mmHg (систолын даралт/диастолын даралт)-аас дээш бол даралт ихсэлт гэж үзнэ.
Хамгийн тохиромжтой цусны даралт нь 115/75mmHg бөгөөд эмнэлгийн үзлэгийн даралт 140/90mmHg-аас давбал даралт ихсэлт гэнэ.

Даралт ихсэлтийн шалтгаан

Даралт ихсэлтийн 90~95% нь шалтгаан нь тодорхойгүй эссенциал (анхдагч) даралт ихсэлт байдаг.
Үлдсэн 5~10 хувь нь бөөр, бөөрний дээд булчирхай, бамбайн өвчин, судасны нарийсал зэрэг даралт ихсэхэд хүргэдэг шалтгаан өвчнөөс болж даралт нэмэгддэг хоёрдогч даралт ихсэлт бөгөөд ийм тохиолдолд шалтгаан өвчнийг эмчилбэл даралт хэвийн болдог.

Даралт ихсэлтийн шинж тэмдэг

Ихэнх тохиолдолд даралт ихсэлт шинж тэмдэггүй байдаг. Толгой эргэх, толгой өвдөх, хүзүүний ар өвдөх зэрэг шинж илэрвэл даралт өндөр болсон гэж боддог ч эдгээр шинжийн ихэнх нь даралт ихсэлттэй бага холбоотой тул даралтаа тогтмол хэмжихээс өөр мэдэх арга байхгүй.
Ховор тохиолдолд диастолын даралт 110mmhg-аас дээш өсвөл толгой өвдөх, бие хавагнах, зүрх дэлсэх, толгой өвдөх, толгой эргэх шинж илэрч болно.