반월상 연골판 손상
Мениск гэмтэл гэж юу вэ?
Мениск нь өвдөгний ясны хооронд байрлах хавирган сар хэлбэрийн мөгөөрсөн бүтэц бөгөөд өвдөгний үенд ирэх цохилтыг зөөлрүүлэх үүргийг голчлон гүйцэтгэдэг ба үений тогтвортой байдал, тосолгооны үйл ажиллагаа, өөрийн байрлалыг мэдрэх мэдрэхүй зэрэг үүрэгтэй. Мениск гэмтвэл цочмог үедээ хавдах, хүчтэй өвдөх нь олонтоо. Өвдөгний хүч суларч нугарах шинж, өвдөгөө нугалж тэнийлгэх явцад өвдөх ба тээглэх мэдрэмж, өвдөгний чимээ болон тогтворгүй байдал зэрэг шинж илэрч байвал ч мениск гэмтлийг сэжиглэж болно.
Шалтгаан
Мөгөөрс нь ерөнхийдөө хэт их цохилт буюу эргэлтээс болж гэмтдэг. Өвдөгний мөгөөрс нь маш энгийн өдөр тутмын хөдөлгөөн, тухайлбал теннис тоглохоор биеэ эргүүлэх, сагсан бөмбөг тоглохдоо бөмбөгөө тоглуулан өрсөлдөгчийг тойрох үед ч гэмтэж болно.
-
Мениск дээр хүчтэй цохилт гэнэт үйлчилснээр урагдана
-
Мениск хөгшрөлтөөс болж сульдан амархан урагдана
-
Мениск төрөлхийн гажигтай бол хэвийн хүнийхээс амархан урагдана
Оношилгоо
Мениск нь рентген зурагт харагддаггүй тул нарийн асуумж, бодит үзлэг, рентген шинжилгээ шаардлагатай бөгөөд гэмтэл сэжиглэгдвэл MRI шинжилгээ хийж эмчилгээний чиглэлээ тогтоодог.
Эмчилгээ
Мениск гэмтэл нь консерватив эмчилгээгээр өөрөө эдгэрэхэд бэрх боловч шинж тэмдэг хөнгөн бол ДНХ тарилгын эмчилгээ, гар эмчилгээ зэрэг консерватив эмчилгээгээр дасгал хөдөлгөөн, амьдралын хэв маягаа сайжруулж шинж тэмдэг хөнгөрөхийг хүлээж болно. Гэвч MRI шинжилгээгээр урагдсан менискний эдгэрэх чадварыг үнэлж, урагдлын байрлал, зэрэг, түүнчлэн өвдөгний үений дагалдах холбоосны гэмтэл, артрит байгаа эсэхийг харгалзан үзэж, мөгөөрс өргөн хүрээнд гэмтсэн, эсвэл өвдөлт, хөдөлгөөний хязгаарлалт зэргээс өдөр тутмын амьдралд хязгаарлалт үүсч байвал артроскопоор мэс засал хийхийг нягтлан авч үздэг.