Улс даяар нүсэр халуун: «архаг бөөрний өвчтэй» хүмүүсийн бөөрний эрүүл мэндийн хяналт эрсдэлд

 Кали ихтэй амтат гуа, тарвас, гадил хориотой…ус уухаа ч мэргэжлийн эмчтэй заавал зөвлөлд
Улс даяар аагим халуун үргэлжилж байна. Ихэнх бүс нутагт халууны аюулын сэрэмжлүүлэг зарласан байхад өдрийн хамгийн их температур 38℃-т ойртож байна. Шөнө ч хамгийн бага температур 25℃-аас доош буудаггүй халуун шөнө тохиолдох газар олон байна. Аагим халуунд эрүүл мэндээ хамгаалахад онцгой анхаарал шаардлагатай.

Архаг бөөрний өвчтэй хүн халуун илч болон шингэн алдалтаас үүдэх бөөрний эрүүл мэндийн хяналтад илүү анхаарах хэрэгтэй. Бөөр бол биеийн доторх орчныг тогтвортой байлгадаг чухал эрхтэн юм. Бөөр нь хялгасан судаснуудаас тогтсон сая сая бөөрөнцөрийн эдээр дамжуулан биеийн доторх хаягдал бодисыг шүүж, цусыг цэвэршүүлдэг. Ингэснээр биеийн шингэн, электролитийн тэнцвэр, дааврын зохицуулга зэрэг биеийн доторх гомеостазыг хадгалдаг.

Бөөрний үйл ажиллагаа 3 сараас дээш хугацаанд тасралтгүй буурсан буюу гэмтэл нь батлагдсан тохиолдолд архаг бөөрний өвчин гэж оношлогддог. Архаг бөөрний өвчин бол Солонгосын хүн амын 7~8 хүн тутмын нэг нь өвчилдөг өвчин юм. Хүн ам хөгширч байгаатай холбоотойгоор өвчлөл нэмэгдсээр байна.

Архаг бөөрний өвчин нь бөөрний үйл ажиллагааны бууралтын түвшнээс хамааран хэвийнд ойр 1-р үе шатнаас эхлээд диализ хийхээр авч үзэх шаардлагатай 5-р үе шат хүртэл хуваагддаг. Үе шат ахих тусам зүрх судасны хүндрэл зэрэг олон төрлийн хүндрэл дагалдах эрсдэл нэмэгддэг. Эцсийн шатны бөөрний дутагдал руу шилжвэл тавилан муу бөгөөд нас баралт ч ихээхэн нэмэгддэг.

Бөөрний үйл ажиллагаа буурсан ч эхэн үедээ ихэнхдээ өөрийн мэдрэх шинж тэмдэг илэрдэггүй. Шээсний шинжилгээгээр уураг илэрч, дүрс оношилгоогоор эмгэг өөрчлөлт олдох хүртэл бөөрний үйл ажиллагааны бууралтыг анзаардаггүй өвчтөн ихэнх нь байдаг. Архаг бөөрний өвчний хувьд эхэн үед нь өвчнийг эрт илрүүлж, тогтмол хяналтаар өвчин хүндрэхээс сэргийлэх нь чухал. Чихрийн шижин, даралт ихсэлт нь архаг бөөрний өвчнийг үүсгэдэг гол шалтгаанд зүй ёсоор ордог.

Архаг бөөрний өвчтэй хүмүүс зуны улиралд бөөрний эрүүл мэндэд анхаарах хэрэгтэй. Ялангуяа халуун сарууд архаг бөөрний өвчтэй хүний бөөрөнд ачаалал өгдөг. Хэт халуун нь шингэн алдалт, электролитийн тэнцвэргүйдэл үүсгэдэг. Үүн дээр шээс хөөх эм зэрэг хэрэглэж буй эмийн нөлөө нэмэгдвэл эрсдэл улам ихэснэ.

Их халуунаас үүдэлтэй шингэн алдалт бөөрний цусан хангамжийг бууруулдаг. Цочмог бөөрний гэмтлийн эрсдэлийг нэмэгдүүлж, бөөрний архаг өвчний шинж тэмдгийг хүндрүүлдэг. Өндөр температурын нөхцөлд бөөрний өвчин үүсэх, эмнэлэгт хэвтэх, яаралтай тусламжид хандах зэрэг эрсдэл 30% орчмоор нэмэгддэг гэсэн судалгааны тайлан ч бий.

Архаг бөөрний өвчтэй хүн зуны улиралд хооллолтоо ч зохицуулах шаардлагатай. Амтат гуа, тарвас, гадил зэрэг кали ихтэй зуны жимс бөөрөнд ачаалал өгч, цусан дахь кали ихсэх эрсдэлтэй тул хэрэглээгээ заавал хязгаарлах ёстой. Халуун гэж жүүс, ионы ундаа хэт их уухаас татгалзана. Өдөрт 5 г-аас дээш давс хэтрүүлэн хэрэглэх, кофейн, архи агуулсан ундаа хэрэглэхээс ч зайлсхийх нь зохимжтой.

Бөөрний үйл ажиллагаа, өвчний байдалд тохирсон зохистой шингэн хэрэглээ ч чухал. Зуны халуунд хөлс их гарснаар цангаагаа тайлах гэж ердийнхөөс их ус уух нь амархан. Хэт их шингэн хэрэглэх нь архаг бөөрний өвчтэй хүний бөөрөнд дарамт учруулж болзошгүй тул болгоомжлох хэрэгтэй. Ус уухдаа нэг дор их хэмжээгээр уухаас илүү хугацаа зааглан хэд хуваан уухыг зөвлөдөг.

Ялангуяа шингэн алдалт үргэлжлэх, шээсний хэмжээ, өнгө өөрчлөгдөх, хэт их ядрах зэрэг эмгэг шинж илэрвэл зүгээр л халуунаас болсон гэж өнгөрөөхгүйгээр эмнэлэгт хандаж мэргэжлийн эмчээс зөвлөгөө авах нь зүйтэй.

Гэгээн Петрийн эмнэлгийн нефрологийн тасгийн эрхлэгч Ли Жи Ён “Архаг бөөрний өвчтэй хүмүүс зуны улиралд шингэн алдалт болон бөөрний үйл ажиллагаа муудах эрсдэлээс юуны түрүүнд болгоомжлох ёстой. Улирлын онцлогоос хамаарсан эрсдэлт хүчин зүйлс давхцан бөөрний үйл ажиллагаа буурах эрсдэлд анхаарах хэрэгтэй” гэж хэлээд “Заавал ус ууж, шимт хоол идэхээс илүү эмч нартайгаа зөвлөлдөж, өөрийн бөөрний үйл ажиллагаа болон өвчний байдлыг харгалзан анхааралтай хянах шаардлагатай” гэлээ.

Эх сурвалж : Кориа Хэлслог(https://www.koreahealthlog.com)